മലയാളികൾക്കും ഏറെ സുപരിചിതനായ തമിഴ് സൂപ്പർതാരം ആണ് ശരത് കുമാർ. ഇദ്ദേഹത്തിന്റെ മകളും തെന്നിന്ത്യൻ താരസുന്ദരിയുമായ വരലക്ഷ്മി ശരത്കുമാറും മലയാളികൾക്ക് പ്രിയങ്കരിയാണ്. മലയാള സിനിമയിലടക്കം വേഷം ഇട്ടിട്ടുള്ള വരലക്ഷ്മിക്ക് കേരളത്തിൽ ആരാധകരും ഏറെയാണ്. ശരത്കുമാറിന്റെയും മുൻഭാര്യ ഛായാ ദേവിയുടെയും മൂത്തമകളാണ് വരലക്ഷ്മി. മലയാളത്തിൽ മമ്മൂട്ടി ചിത്രം ‘കസബ’യിലെ നായികയായിരുന്നു വരലക്ഷ്മി.
മുംബൈ ഗാലറിസ്റ്റായ നിക്കോളൈ സച്ദേവിനെയാണ് വരലക്ഷ്മി വിവാഹം കഴിച്ചിരിക്കുന്നത്. തായ്ലൻഡിൽ വച്ച് 2024ലായിരുന്നു ഇവരുടെ വിവാഹം. വളരെ അടുത്ത ബന്ധുക്കളും ചലച്ചിത്ര ലോകത്തെ പരിചയക്കാരും മാത്രമേ വിവാഹത്തിൽ പങ്കുകൊണ്ടുള്ളൂ. വരലക്ഷ്മിയുടെ ആദ്യത്തെ വിവാഹമാണെങ്കിലും, നിക്കോളൈ സച്ദേവ് മുൻപ് വിവാഹിതനായിരുന്നു.
ഒരു മകളുടെ പിതാവ് കൂടിയായിരുന്നു അദ്ദേഹം. വരലക്ഷ്മിയുടെ അച്ഛനും രണ്ട് അമ്മമാരും, സഹോദരങ്ങളും ചേർന്ന ഗംഭീര ആഘോഷ ചടങ്ങിലായിരുന്നു വിവാഹം. തിരികെ നാട്ടിലെത്തിയതും, മണിരത്നം, എആർ റഹ്മാൻ എന്നിവർ ഉൾപ്പെടെ പങ്കെടുത്ത വിവാഹ സൽക്കാര ചടങ്ങുകൾ നടന്നു
ശരീരത്തിൽ ടാറ്റൂ ചെയ്ത കൂൾ ലുക്കുള്ള നിക്കോളൈ മുണ്ടും ഷർട്ടും ധരിച്ച് തനി ‘തമിഴ്നാട് മാപ്പിളൈ’ ആയി മാറി. ഒരു മികച്ച ഭർത്താവ് എങ്ങനെയാകണം എന്നതിന് വരലക്ഷ്മിക്ക് മുന്നിലെ ഉദാത്തമായ ഉദാഹരണമാണ് നിക്കോളൈ എന്ന് അവർ തന്നെ ഒരു പോസ്റ്റിൽ ഒരിക്കൽ പറയുകയുണ്ടായി.
എന്നാൽ, താൻ ഭാര്യ എന്ന നിലയിൽ പെർഫെക്റ്റ് അല്ല എന്ന് പൊതുവേദിയിൽ വച്ച് വരലക്ഷ്മി അടുത്തിടെ പറയുകയുണ്ടായി. അതേ സമയം വരലക്ഷ്മിയുടെ വിവാഹത്തെക്കുറിച്ച് വർഷങ്ങൾ നീണ്ട ഊഹാപോഹങ്ങൾ നടന്നിരുന്നു. അതിലൊന്നിൽ കേട്ട പേര് നടൻ വിശാലിന്റെതായിരുന്നു. ഇവർ പ്രണയത്തിലായിരുന്നോ അല്ലയോ എന്ന കാര്യത്തിൽ, എവിടെയും തുറന്നു പറയലുകൾ ഉണ്ടായില്ല എങ്കിലും ഗോസിപ്പ കോളങ്ങളിൽ സജീവമായിരുന്നു.
ഇപ്പോൾ തന്റെ ഭർത്താവിനെ കണ്ടുമുട്ടിയ നിമിഷത്തെക്കുറിച്ച് വരലക്ഷ്മി തുറന്നു പറയുകയാണ്. തന്റെ അർധ സഹോദരിയായ റയാൻ മിഥുനിന്റെ മുന്നിലാണ് വരലക്ഷ്മി മനസുതുറന്നത് . റയാനും വരലക്ഷ്മിയും നല്ല സുഹൃത്തുക്കൾ കൂടിയാണ്. ഒരുപക്ഷേ കുടുംബത്തിന്റെ ഉള്ളിൽ ഏവർക്കും സുപരിചിതമായ ഒരു കഥ, അവർ ആരാധകർക്കും പ്രേക്ഷകർക്കും വേണ്ടിക്കൂടി പങ്കിടുകയാണ്.
വരലക്ഷ്മിയുടെ പ്രണയം മൊട്ടിടാൻ കാരണമായത് നമ്മുടെ കൊച്ചു കേരളം ആണ്. മൂന്നാറിലെ റിസോർട്ടിൽ അവധിക്കാലം ചിലവിടാൻ വന്ന രണ്ട് അപരിചിതരായിരുന്നു വരലക്ഷ്മിയും നിക്കോളൈ സച്ദേവും. ഒരൊറ്റ രാത്രി കൊണ്ടാണ് തങ്ങൾ പ്രണയത്തിലായത് എന്ന് വരലക്ഷ്മി പറയുന്നു. ജീവിതത്തിൽ ആദ്യമായാണ് തന്റെയും നിക്കിന്റെയും രസകരമായ പ്രണയകഥയെ കുറിച്ച് അവർ തുറന്ന് സംസാരിക്കുന്നത്.
കണ്ടുമുട്ടുന്ന സമയം ഒരു വിവാഹത്തിൽ നിന്ന് നിക്ക് പുറത്തിറങ്ങുന്ന സമയമായിരുന്നു. അദ്ദേഹത്തിന് ഒരു മകൾ കൂടിയുണ്ടായിരുന്നു. അവിടെ കണ്ടുമുട്ടിയ ഒരു രാത്രി കൊണ്ട് ഞങ്ങൾ പ്രണയത്തിലായി എന്ന് വരലക്ഷ്മി പറയുന്നു.
മൂന്നാറിൽ ക്ലബ് മഹീന്ദ്ര റിസോർട്ടിലാണ് തങ്ങൾ പരിചയപ്പെട്ടത്. നിക്കോളൈ പൂൾ കളിക്കുന്ന സമയമായിരുന്നു. അതിനിടെ അവർ തമ്മിൽ ഒരു സംഭാഷണം നടന്നു. അത് വളരെ വേഗത്തിലെ സോൾമേറ്റ് കണക്ഷൻ ആയിരുന്നു.
ആ ഒരു രാത്രിയിലെ പരിചയത്തിൽ നിന്നും അകലാൻ തങ്ങൾക്ക് ഏറെ ബുദ്ധിമുട്ടായിരുന്നു. ജീവിതത്തിൽ ഒരിക്കൽ പോലും കണ്ടിട്ടില്ലാത്ത ഒരു വ്യക്തിക്ക് വേണ്ടി കരയുന്ന അവസ്ഥയിലെത്തി എന്ന് വരലക്ഷ്മി. ഇന്ന് നിക് ഇവരുടെ കുടുംബത്തിലെ പ്രധാന അംഗമാണ്. ശരത്തിനും രാധികയ്ക്കും ഛായക്കും എല്ലാം വളരെ വേണ്ടപ്പെട്ട ഒരാളായി മാറാൻ ചുരുങ്ങിയ കാലം കൊണ്ട് അദ്ദേഹത്തിന് സാധിച്ചിരിക്കുന്നു.
