തൃശൂര്‍: കാമുകനൊപ്പം കൊട്ടേഷന്‍ നല്‍കി ഭര്‍ത്താവിനെ വധിക്കാന്‍ ശ്രമിച്ച ഭാര്യ വീട്ടില്‍ മടങ്ങിയെത്തിയപ്പോള്‍ പറഞ്ഞത് ‘ ചേട്ടാ തെറ്റ് പറ്റിപ്പോയി, ക്ഷമിക്കണം’ എന്നാണ്. കൊടും ക്രൂരത തന്നോട് ഭാര്യ ചെയ്‌തെന്ന് തിരിച്ചറിഞ്ഞപ്പോഴും ഇതിന് മറുപടിയായി കൃഷ്ണകുമാര്‍ പറഞ്ഞ വാക്കുകളാണ് ഭാര്യയെ ഇഞ്ചിഞ്ചായി കൊല്ലുന്നത്.
‘നിന്നെ ഇത്രയും സ്നേഹിച്ചിട്ടും കൊല്ലാന്‍ പറഞ്ഞു കളഞ്ഞല്ലോ’ എന്ന് കണ്ണീരോടെ കൃഷ്ണകുമാര്‍ പറഞ്ഞു. ഭാര്യയെ അറസ്റ്റ് ചെയ്യാന്‍ പോലീസും ഈ സമയം വീട്ടില്‍ ഉണ്ടായിരുന്നു. അവരും ഒരു നിമിഷം ഈറനണിഞ്ഞു.
മുന്‍കൂട്ടി നിശ്ചയിച്ച കൃത്യമായ ആസൂത്രണ പ്രകാരമായിരുന്നു തിരൂര്‍ സ്വദേശിനി സുജാതയും കാമുകനായ സുരേഷ് ബാബുവും ചേര്‍ന്ന് കൃഷ്ണകുമാറിനെ കൊലപ്പെടുത്താന്‍ ശ്രമിച്ചത്. വയനാട്ടില്‍ തോട്ടം പാട്ടത്തിനെടുത്ത് കൃഷി ചെയ്ത് വരികയായിരുന്നു കൃഷ്ണകുമാര്‍. തിങ്കളാഴ്ച പുലര്‍ച്ചെ തോട്ടത്തിലേക്ക് പോകാനായിരുന്നു കൃഷ്ണകുമാറിന്റെ പദ്ധതി. ഇതറിഞ്ഞ സുജാത കാമുകനെ വിളിച്ച് കൃഷ്ണകുമാര്‍ പോകുന്ന സമയവും മറ്റ് വിവരങ്ങളും അറിയിച്ചു. തുടര്‍ന്ന് കാമുകന് ക്വട്ടേഷ സംഘത്തിന് വിവരം നല്‍കി. അവര്‍ കൃഷ്ണകുമാറിനെയും കാത്ത് കാറില്‍ കാത്തിരുന്നു. വീട്ടില്‍ നിന്നിറങ്ങിയ കൃഷ്ണകുമാര്‍ അവിചാരിതമായി കാര്‍ നിര്‍ത്തിയിട്ടിരിക്കുന്നത് ശ്രദ്ധിച്ചിരുന്നു.
നടന്ന് പോയപ്പോള്‍ കാര്‍ തിരിക്കുന്നതും കൃഷ്ണ കുമാര്‍ ശ്രദ്ധിച്ചിരുന്നു. പിന്നീടാണ് പാഞ്ഞെത്തിയ കാര്‍ കൃഷ്ണകുമാറിനെ ഇടിച്ച് തെറിപ്പിച്ചത്. ഇടിയുടെ ആഘാതത്തില്‍ കൃഷ്ണകുമാര്‍ തെറിച്ചുവീണു. അപകടത്തില്‍ കാലിനും തോളെല്ലിനും പൊട്ടല്‍ സംഭവിച്ചെങ്കിലും ജീവന്‍ തിരികെ ലഭിച്ചു. ആശുപത്രി കിടക്കയിലായിരുന്നപ്പോഴും കൃഷ്ണകുമാറിന്റെ ചിന്ത കാറിനെ കുറിച്ചായിരുന്നു.
ആ കാര്‍ തിരിച്ച് തന്നെ ഇടിച്ചത് മനപ്പൂര്‍വ്വമല്ലേ എന്നായിരുന്നു കൃഷ്ണകുമാര്‍ ചിന്തിച്ചിരുന്നത്. പതിവില്ലാതെ വഴിയില്‍ കാര്‍ നിര്‍ത്തിയിരിക്കുന്നു, താന്‍ പോന്നതിന് ശേഷം കാര്‍ തിരിച്ച് തന്റെ നേര്‍ക്ക് വരുന്നു, വഴിയുടെ അരിക് ചേര്‍ന്ന് നടന്ന തന്നെ ഇടിച്ച് തെറിപ്പിച്ച് കടന്നു പോകുന്നു. തന്നെ കൊല്ലുക തന്നെയല്ലായിരുന്നോ അവരുടെ ലക്ഷ്യം? കൃഷ്ണകുമാര്‍ ചിന്തിച്ചെടുത്തു.
ഇതിനിടെ പോലീസില്‍ പരാതി പെടേണ്ടെന്ന് ഭാര്യ സുജാത പറഞ്ഞു കൊണ്ടിരുന്നു. ഇതും സംശയത്തിന്റെ തോത് വര്‍ദ്ധിപ്പിച്ചു. ഭാര്യയും സുരേഷ് കുമാറും തമ്മിലുള്ള അടുപ്പം കൃഷ്ണകുമാറിന് അറിയാമായിരുന്നു. ഇതോടെ കൃഷ്ണകുമാര്‍ വീയൂര്‍ എസ്.ഐയെ വിളിച്ച് അപകടവിവരം പറയുകയും കാറിന്റെ വിവരങ്ങള്‍ നല്‍കുകയും ചെയ്തു. തുടര്‍ന്ന് പോലീസ് അന്വേഷണം ഇടിച്ചിട്ട വാഹനത്തെ കുറിച്ചായിരുന്നു. നമ്പര്‍ വെച്ച് കാറിന്റെ ഉടമയെ കണ്ടെത്തി. ഇതോടെ കാര്‍ വാടകയ്‌ക്കെടുത്തവരുടെ വിവരം ലഭിച്ചു. ആദ്യ അറസ്റ്റ് തൃശൂര്‍ സ്വദേശി ഓമനക്കുട്ടനെയായിരുന്നു. ഇതോടെ സംഭവത്തിന്റെ ചുരുളഴിയാന്‍ തുടങ്ങി.
ഓമനക്കുട്ടന്‍ പോലീസിന് മുന്നില്‍ ക്വട്ടേഷന്‍ വിവരം വെളിപ്പെടുത്തി. ഇതോടെ പ്രതികള്‍ ഓരോരുത്തരായി പിടിയിലായി. നാല് ലക്ഷം രൂപയ്ക്കാണ് ക്വട്ടേഷന്‍ ഉറപ്പിച്ചത്. അഡ്വാന്‍സായി 10,000 രൂപ നല്‍കുകയും ചെയ്തു. സുരേഷ് ബാബുവാണ് കൃഷ്ണകുമാറിന്റെ വിവരങ്ങള്‍ ക്വട്ടേഷന്‍ സംഘത്തിന് കൈമാറിയിരുന്നതെന്ന് പോലീസിന് വ്യക്തമായി. ഇതോടെയാണ് സുരേഷ് ബാബുവും സുജാതയും പിടിയിലാകുന്നത്.
വാട്സ്ആപ്പ് സന്ദേശങ്ങൾ നിർണായക തെളിവാകും
ഭർത്താവിനെ കൊല്ലാൻ ഭാര്യ കാമുകന് ക്വട്ടേഷൻ നൽകിയ സംഭവത്തിൽ വാട്സ്ആപ്പ് സന്ദേശങ്ങൾ നിർണായക തെളിവാകും. കോലഴിയിൽ ഭർത്താവിനെ കൊല്ലാൻ ക്വട്ടേഷൻ സംഘത്തിന് ഭാര്യയും കാമുകനും സന്ദേശങ്ങൾ കൈമാറിയത് വാട്സ്ആപ്പ് വഴിയാണ്.
കൃഷ്ണകുമാറിനെ കൊലപ്പെടുത്താൻ ശ്രമിച്ച കേസിലെ പ്രതികളെ ചോദ്യം ചെയ്തതിൽ നിന്നും ഭാര്യ സുജാത തന്നെയാണ് ക്വട്ടേഷൻ നൽകാൻ മുൻകയ്യെടുത്തെന്ന് ബോധ്യപ്പെട്ടിട്ടുണ്ട്. തെളിവെടുപ്പിനായി സുജാതയെ വീട്ടിലേക്ക് കൊണ്ടുപോയപ്പോൾ സുജാത ഭർത്താവ് കൃഷ്ണകുമാറിനോട് പറഞ്ഞതിങ്ങനെ ’ ചേട്ടാ തെറ്റുപറ്റി, ക്ഷമിക്കണം’. കൃഷ്ണകുമാറിന്റെ മറുപടി – ’ഇത്രയും സ്നേഹിച്ചിട്ടും എന്നെ കൊല്ലാൻ നീ പറഞ്ഞില്ലേ’.
സംഭവം നടന്ന 22ന് പറവൂരിലെ വീട്ടിലേക്ക് പോകാൻ പുലർച്ചെ നാലോടെയാണ് കൃഷ്ണകുമാർ എണീറ്റത്. ഇതേസമയത്തുതന്നെ ക്വട്ടേഷൻ സംഘവും വീടിനു പരിസരത്ത് എത്തിയതായാണ് വിവരം. ഭർത്താവിന്‍റെ ഓരോ ചലനങ്ങളും ഭാര്യ വാട്സ്ആപ്പ് സന്ദേശങ്ങളിലൂടം ക്വട്ടേഷൻ സംഘത്തിന് നൽകിക്കൊണ്ടിരുന്നു. പുലർച്ചെ അഞ്ചോടെ ഭാര്യയോട് യാത്ര പറഞ്ഞ് കൃഷ്ണകുമാർ റോഡിലിറങ്ങി. ഇറങ്ങിയത് കൃഷ്ണകുമാറാണെന്നും സുജാത സന്ദേശത്തിലൂടെ സംഘത്തെ അറിയിച്ചു.
വാട്സ്ആപ്പ് സന്ദേശം കിട്ടിയയുടനെ കുറച്ചകലെ പാർക്ക് ചെയ്തിരുന്ന കാർ സ്റ്റാർട്ട് ചെയ്തു. കാർ ഓടിച്ചത് ഓമനക്കുട്ടനാണ്. കൃഷ്ണകുമാറിനെ പിന്നിൽ നിന്നും ഇടിച്ചു വീഴ്ത്താനായിരുന്നു ഉദ്ദേശം. എന്നാൽ അപ്രതീക്ഷിതമായി കൃഷ്ണകുമാർ റോഡ് ഇടമുറിഞ്ഞ് ബസ് സ്റ്റോപ്പിലേക്ക് നീങ്ങിയത് ക്വട്ടേഷൻ സംഘത്തിന്‍റെ കണക്കുകൂട്ടൽ തെറ്റിച്ചു. കാർ കൃഷ്ണകുമാറിന് നേരെ തിരിച്ചെടുക്കേണ്ടി വന്നത് അതുകൊണ്ടാണ്.
അപകടത്തിൽ തോളെല്ലിനും കാലിനും പരിക്കുപറ്റി റോഡിൽ കിടന്ന കൃഷ്ണകുമാർ കരുതിയത് ഡ്രൈവർ ഉറങ്ങിയതാകാമെന്നാണ്. എന്നാൽ എന്നാൽ കാർ വേഗത്തിൽ നിർത്താതെ പോയത് കൃഷ്ണകുമാറിന് സംശയത്തിനിടയാക്കി. ഈ സംശയമാണ് ആശുപത്രിയിൽവച്ച് കൃഷ്ണകുമാർ പോലീസിനോട് പറഞ്ഞത്.
കൃഷ്ണകുമാറിന്റെ സംശങ്ങൾക്ക് പോലീസ് തീർപ്പുകൽപ്പിച്ചപ്പോഴാണ് സ്വന്തം ഭാര്യ തന്നെയാണ് കൊലപ്പെടുത്താൻ ശ്രമിച്ചതെന്ന് കൃഷ്ണകുമാർ അറിഞ്ഞത്. പ്രഭാതസവാരിക്ക് പോകുന്നവരുടെ സഹായത്തോടെയാണ് കൃഷ്്ണകുമാർ് തന്നെ ഇടിച്ച കാറിന്റെ നന്പർ കണ്ടെത്തിയത്. ഇതിന്‍റെ ഉടമ കാർ വാടകയ്ക്ക് കൊടുത്തിരിക്കുകയായിരുന്നുവെന്ന് പോലീസിനോട് പറയുകയും വാടകക്കെടുത്തവരെ തേടിയുള്ള അന്വേഷണത്തിനൊടുവിൽ പ്രതികൾ കുടുങ്ങുകയുമായിരുന്നു.
ക്വട്ടേഷൻ കൊടുത്തയാൾക്ക് തിരിച്ചുപണികൊടുക്കാൻ വരുന്പോൾ കുടുങ്ങി
ക്വട്ടേഷൻ കൊടുത്ത സുരേഷ്ബാബുവിന് തിരിച്ചു പണി കൊടുക്കാനൊരുങ്ങുന്നതിനിടെയാണ് ക്വട്ടേഷൻ സംഘം പോലീസ് പിടിയിലായത്. കൃഷ്ണകുമാറിനെ കൊലപ്പെടുത്താൻ നാലു ലക്ഷം രൂപയ്ക്ക ്ക്വട്ടേഷൻ ഉറപ്പിച്ച സുരേഷ്ബാബു പക്ഷേ കൊലപാതകം നടക്കാതെ പോയതുകൊണ്ട് ക്വട്ടേഷൻ സംഘത്തിന് വാഗ്ദാനം ചെയ്ത പണം നൽകിയിരുന്നില്ല.
ഇതിൽ രോഷാകുലരായ ക്വട്ടേഷൻ സംഘം സുരേഷ്ബാബുവിനെ കൈകാര്യം ചെയ്ത് പണം മേടിക്കാനായി പദ്ധതി ആസൂത്രണം ചെയ്യുന്നതിനിടെയാണ് പോലീസിന്റെ പിടിയിലായത്. കസ്റ്റഡിയിലെടുത്ത കാറിൽ നിന്ന് ആയുധങ്ങളും മറ്റും കണ്ടെടുത്തിരുന്നു. അഞ്ചുവർഷമായി കൃഷ്ണകുമാറും ഭാര്യ സുജാതയും മാനസികമായി അകൽച്ചയിലായിരുന്നുവത്രെ.
സുരേഷ്ബാബുവുമായുള്ള അടുപ്പം കൃഷ്ണകുമാറിന് നേരത്തെ അറിയാമായിരുന്നു. ഇതുസംബന്ധിച്ച് വിയ്യൂർ പോലീസിൽ കൃഷ്ണകുമാർ നേരത്തെ പരാതി നൽകിയപ്പോൾ ഇരുകൂട്ടരേയും സ്റ്റേഷനിലേക്ക് വിളിപ്പിച്ചപ്പോൾ സുരേഷ്ബാബു ഹാജരായില്ല. തുടർന്ന് സുജാതയെ താക്കീത് നൽകി വിട്ടയച്ചു. സുജാതയുമായുള്ള അടുപ്പത്തെ ചൊല്ലി സുരേഷ്ബാബുവിന്‍റെ ഭാര്യ സുരേഷ്ബാബുവിന്‍റെ ഭാര്യയും പിണങ്ങി നിൽക്കുകയായിരുന്നു.
