Entertainment Movies

25 വ്യത്യസ്ത ഗെറ്റപ്പിൽ ഞെട്ടിക്കാൻ ഒരുങ്ങി വിക്രം: അജയ് ജ്ഞാനമുത്തു ഒരുക്കുന്നത് കിടിലൻ സിനിമ

ഒന്നിലധികം കഥാപാത്രങ്ങളെയും ദ്വന്ദവ്യക്ത്വങ്ങളെയുമെല്ലാം ഒരു ചിത്രത്തിൽ തന്നെ അവതരിപ്പിച്ച് കയ്യടി നേടിയ താരമാണ് ആരാധകരുടെ വിക്രമെന്ന ചിയാൻ വിക്രം. കഥാപാത്രത്തിന്റെ പൂർണ്ണതയ്ക്കു വേണ്ടി ഏതറ്റം വരെയുള്ള മെയ്ക്കോവറും ചെയ്യാൻ ഒരുക്കമാണെന്നാണ് താരത്തിന്റെ പക്ഷം.

അന്യൻ, ഐ തുടങ്ങിയ ചിത്രങ്ങൾ ഇതിന്റെ മികച്ച ഉദാഹരണങ്ങളാണ്. ഇപ്പോൾ വീണ്ടും കിടിലൻ വേഷപ്പകർച്ച കൊണ്ട് ആരാധകരെ വിസ്മയിപ്പിക്കാൻ എത്തുകയാണ് ഈ നടൻ. തന്റെ പുതിയ ചിത്രത്തിൽ 25 വ്യത്യസ്ത വേഷങ്ങളിലാണ് ചിയാൻ വിക്രം പ്രത്യക്ഷപ്പെടുക. ചിത്രത്തിന്റെ ഫസ്റ്റ് ലുക്ക് പോസ്റ്ററുകൾ സൂചിപ്പിക്കുന്നത് ഈ വ്യത്യസ്ത ഗെറ്റപ്പുകളാണ്.

അജയ് ജ്ഞാനമുത്തു സംവിധാനം ചെയ്യുന്ന ചിത്രത്തിലാണ് വിക്രം 25 വേഷങ്ങളിലെത്തുന്നത്. നയൻതാര നായികയായെത്തിയ ഇമൈക്ക നൊടികൾ ഒരുക്കിയത് ഇദ്ദേഹമാണ്. വിക്രമിന്റെ 58ാമത്തെ ചിത്രമാണിത്. പ്രിയ ഭവാനി ശങ്കർ ആകും വിക്രമിന്റെ നായികയായെത്തുക.

ഇതുവരെ പേര് നൽകാത്ത ചിത്രം നിർമ്മിക്കുന്നത് 7 സ്‌ക്രീൻ സ്റ്റുഡിയോസും വയാകോം18 സ്റ്റുഡിയോസും ചേർന്നാണ്. എആർ റഹ്മാൻ സംഗീത സംവിധാനം നിർവഹിക്കുന്നു. 2020 ഏപ്രിലിൽ ചിത്രം റിലീസ് ചെയ്യുമെന്നാണ് വവരം.