നിരവധി ക്ലാസിക് ഹിറ്റുകൾ സമ്മാനിച്ചിട്ടുള്ള ടികെ രാജീവ് കുമാർ മലയാള സിനിമയിലെ ഏറ്റവും പരിചയ സമ്പന്നരായ സംവിധായകരിൽ ഒരാളാണ്. ഒട്ടേറെ ഹിറ്റ് ചിത്രങ്ങൾ നമ്മുക്ക് സമ്മാനിച്ചിട്ടുള്ള അദ്ദേഹം ഒരുപാട് ക്ലാസ്സിക് ചിത്രങ്ങളും മലയാള സിനിമാ പ്രേമികൾക്ക് മുന്നിൽ എത്തിച്ചിട്ടുണ്ട്.
ഇപ്പോഴിതാ തന്നെ അത്ഭുതപ്പെടുത്തിയ മലയാള നടൻ ആരാണെന്നു പറയുകയാണ് ടികെ രാജീവ് കുമാർ. മലയാളത്തിന്റെ താരരാജാവ് മോഹൻലാൽ ആണ് ആ നടൻ എന്നാണ് ടികെ രാജീവ് കുമാർ പറയുന്നത്. ടികെ രാജീവ് കുമാർ ഒരുക്കിയ പവിത്രം എന്ന സിനിമയിലെ മോഹൻലാലിന്റെ പ്രകടനം അദ്ദേഹത്തിന്റെ സിനിമാ ജീവിതത്തിലെ മികച്ച പ്രകടനങ്ങളിൽ ഒന്നായാണ് വിലയിരുത്തപ്പെടുന്നത്.
ആ സിനിമയുടെ ക്ലൈമാക്സ് രംഗത്തിൽ മോഹൻലാൽ നടത്തിയ പ്രകടനത്തെ കുറിച്ചു ടികെ രാജീവ് കുമാർ മനസ്സു തുറക്കുകയാണ്. അദ്ദേഹത്തിന്റെ വാക്കുകൾ ഇങ്ങനെ:
മോഹൻലാൽ അവതരിപ്പിക്കുന്ന കഥാപാത്രത്തിന് സമനില തെറ്റിപ്പോകുന്നതാണ് സീൻ. ഷൂട്ടിംഗിന് മുമ്പ് അദ്ദേഹം അസ്വസ്ഥനായിരുന്നു. പിന്നെ എന്നെ വിളിച്ചിട്ടു പറഞ്ഞു, ഞാൻ ദേ ഇത്രയേ കാണിക്കൂ. എന്നിട്ട് പല്ല് ഇറുമ്മി കാണിച്ചു.
മതിയെന്ന് ഞാനും പറഞ്ഞു. പവിത്രം റിലീസ് ചെയ്ത ദിവസം പ്രമുഖ സൈക്യാട്രിസ്റ്റ് ഡോ.സ്വരരാജ മണി എന്നെ ഫോണിൽ വിളിച്ചു. ഒരാൾ മാനസിക വിഭ്രാന്തിയിലേക്ക് പോകുന്നതിന്റെ ആദ്യ സൂചന പല്ലിറുമ്മലാണ്.
ശരീരത്തിന്റെ ചലനം അസ്വാഭാവികമാകും. ആ മാനറിസം ലാൽ ഭംഗിയായി ചെയ്തിട്ടുണ്ട്. ആ വാക്കുകൾ കേട്ട താൻ അത്ഭുതം കൊണ്ട് നിശബ്ദനായി പോയെന്ന് പറയുന്നു ടികെ രാജീവ് കുമാർ. നിത്യാ മേനോൻ കേന്ദ്ര കഥാപാത്രത്തെ അവതരിപ്പിക്കുന്ന കോളാമ്പി എന്ന അദ്ദേഹത്തിന്റെ പുതിയ ചിത്രം റിലീസിന് ഒരുങ്ങുകയാണ്. ഉടൻ തന്നെ മമ്മൂട്ടിയെ വെച്ച് ഒരു ഇംഗ്ലീഷ് ചിത്രം ചെയ്യാനും ടികെ രാജീവ് കുമാറിന് പദ്ധതിയുണ്ട്.
