സോഷ്യൽ മീഡിയ ഉപയോഗിക്കുന്ന ഏതൊരാൾക്കും അഭിരാമി അശോക് യാദവ് എന്ന പേരിനേക്കാളും പരിചയം ആമി അശോകൻ എന്ന പേരാകും. ടിക് ടോക് വീഡിയോളിലൂടെയും, യൂട്യൂബ് വീഡിയോ കളിലൂടെയും പ്രേക്ഷകർക്ക് സുപരിചിതയാണ് ആമി അശോകൻ.
കാസർഗോഡ് ജില്ലയിലെ നീലേശ്വരത്തെ കുമ്പളപ്പള്ളി എന്ന കൊച്ചുഗ്രാമത്തിൽ നിന്നും എത്തിയ ആമി പ്രേക്ഷകർ ഇന്ന് കാണുന്ന ആമിയായി എത്താൻ ഒരുപാട് പ്രതിസന്ധികൾ അതിജീവിച്ചിരുന്നു. ഇപ്പോൾ വ്ളോഗിംഗിങ്ങിലൂടെ ലക്ഷക്കണക്കിന് രൂപ നേടുന്ന ആമി ഫോട്ടോഷൂട്ട് ചിത്രങ്ങളിലൂടെ ഇടയ്ക്ക് സോഷ്യൽ മീഡിയയിൽ വൈറലായിരുന്നു.
ഒരു മോട്ടിവേറ്റർ കൂടിയായ ആമിക്ക് 402 കെ ഫോളോവേഴ്സാണ് ഇൻസ്റ്റയിൽ മാത്രമുള്ളത്. നിരവധി അഭിനേതാക്കൾ വരെ ഫോളോവേഴ്സായുള്ള ആമിയുടെ ഒരു വീഡിയോ ആണിപ്പോൾ സോഷ്യൽ മീഡിയയിൽ ട്രെൻഡിങ് ആകുന്നത്.
പ്രതിസന്ധിഘട്ടത്തെ അതിജീവിച്ചെത്തിയ ആമിയുടെ കഥ മിക്കവർക്കും ഒരു പ്രചോദനം കൂടി ആയിരിക്കും. അടുത്തിടെയാണ് ആമി തന്റെ വിജയകരമായ ജീവിതകഥയെ കുറിച്ച് തുറന്നുപറയുന്നത്. അതോടെയാണ് ആമിയെ കുറിച്ച് കൂടുതലായി ആളുകൾ മനസിലാക്കുന്നതും.
അമ്മയും സഹോദരനും അടങ്ങുന്നതാണ് കുടുംബം. ഡിഗ്രി കംപ്ലീറ്റഡ് ആണ് ജീവിതത്തിൽ ഒരുപാട് സ്ട്രഗിൾ ചെയ്ത ആളുകൾ ഒരിക്കൽ നല്ല നിലയിൽ എത്തിയിട്ടുണ്ടാകാം.അതേപോലെ ആയിരുന്നു തന്റെ ആദ്യകാല ജീവിതം. കുട്ടിക്കാലം മുതലേ സാമ്പത്തികമായി ഏറെ പിന്നോക്കമായിരുന്നു താനും കുടുംബവും എന്ന് പറയുകയാണ് ആമി. ജോഷ് ടോക്കിൽ സംസാരിക്കവെയാണ് ആമിയുടെ വെളിപ്പെടുത്തൽ.
ആമിയുടെ വാക്കുകൾ ഇങ്ങനെ:
സാമ്പത്തികമായി ഏറെ പിന്നോക്കം നിൽക്കുന്ന കുടുംബമായിരുന്നത് കൊണ്ട് സമൂഹത്തിലേക്ക് ഇറങ്ങി ചെല്ലുമ്പോൾ ഒരു വലിയ വിലയൊന്നും ഉണ്ടായിരുന്നില്ല. എന്നാൽ പോലും നമ്മൾ ഉള്ളതുവച്ചു അഡ്ജസ്റ്റ് ചെയ്യാൻ പഠിച്ചവരായിരുന്നു. കുട്ടിക്കാലത്ത് വലിയ ആഗ്രഹങ്ങൾ ഒന്നും ഉണ്ടായിരുന്നില്ല. ഉണ്ടായിരുന്ന ആഗ്രഹങ്ങൾ മനസ്സിൽ സൂക്ഷിച്ചു.
ഇന്ന് ഈ പൊസിഷനിൽ എത്തിയപ്പോൾ മനസ്സിൽ അന്ന് സൂക്ഷിച്ച ആഗ്രഹങ്ങൾ നേടിയിട്ടുണ്ട്. നമ്മൾ ആഗ്രഹിക്കുകയും സ്വപ്നം കാണുകയും അത് നേടാൻ പരിശ്രമിക്കുകയും ചെയ്യുക. ഇന്നത്തെകുട്ടികൾക്ക് എല്ലാം ഉണ്ട്. അന്ന് ഞാൻ പഠിച്ചിരുന്ന കാലത്ത് മറ്റുളളവരുടെ ഡ്രസ്സ് ധരിച്ചുകൊണ്ടായിരുന്നു കോളേജിൽ പോയിരുന്നത്.
അച്ഛൻ മദ്യപിച്ചെത്തുന്ന വീട്, അതാണ് കുട്ടിക്കാലത്തെ ഓർമ്മ. അച്ഛൻ മദ്യപാനി ആയിരുന്നെങ്കിലും ഞങ്ങളോട് വലിയ ഇഷ്ടമായിരുന്നു. എങ്കിലും ഭക്ഷണം ഉണ്ടാക്കി വച്ചാൽ പോലും കഴിക്കാൻ പറ്റാത്ത അവസ്ഥ ഒരുപാട് ഉണ്ടായിട്ടുണ്ട്.
ഇപ്പോഴും മദ്യപാനികളെ എനിക്ക് പേടിയാണ്. പിന്നീട് ബാല്യവും കൗമാരവും കഴിയുന്നു. ജാതകത്തിന്റെയും മറ്റും പ്രശ്‌നവും, കുടുംബത്തിന്റെ പശ്ചാത്തലം മോശം ആയതുകൊണ്ടും വീട്ടുകാർ വിവാഹനിശ്ചയം പതിനാറാം വയസ്സിൽ നടത്തുന്നു. ഇതിന്റെ ഇടയിലാണ് അച്ഛന്റെ മരണം സംഭവിക്കുന്നത്.
ആദ്യം മൂന്നാല് വർഷം കഴിഞ്ഞിട്ടാണ് വിവാഹം എന്ന് പറഞ്ഞുറപ്പിച്ചിരുന്നതെങ്കിലും, വീട്ടിലെ സ്ഥിതി മോശം ആയതിനെത്തുടർന്ന് വിവാഹിതയാകാൻ തീരുമാനിച്ചു. എന്റെ പാർട്ണർ കുടുംബത്തെ സഹായിക്കും എന്നോർത്ത് പതിനെട്ട് വയസ്സ് തികഞ്ഞപ്പോൾ തന്നെ വിവാഹിതയായി. എന്നെക്കാളും നല്ല പ്രായമായ ഒരാളുമായിട്ടാണ് വിവാഹം നടക്കുന്നത്.
പലതരത്തിലുള്ള പ്രശ്‌നങ്ങൾ ജീവിതത്തിൽ ഉണ്ടായി. ഒരുമിച്ചു പോകാൻ പറ്റുന്ന ഒന്നും ഉണ്ടായില്ല. അങ്ങനെ രണ്ടുമാസം കഴിഞ്ഞപ്പോൾ വീട്ടിലേക്ക് തിരികെ എത്തി. എന്നാൽ വീട്ടുകാരുടെ വാക്ക് കേട്ട് വീണ്ടും പോകും വീണ്ടും പ്രശ്‌നങ്ങൾ ആകും. മെന്റലിയും ഫിസിക്കലിയും തളരുന്നു എന്നായപ്പോൾ തനിയെ ജീവിക്കാം എന്ന തീരുമാനത്തിൽ എത്തുകയും ഡിവോഴ്‌സ് നേടുകയും ചെയ്യുന്നു.
അതിനു ശേഷമാണ് ഡിവോഴ്‌സി ഗേൾ ആയതും, രണ്ടാം കെട്ടുകാരി എന്ന പേര് ലഭിക്കുന്നതും. പക്ഷെ ഒരിക്കലും എന്ത് കൊണ്ട് ഡിവോഴ്‌സ് നേടി എന്ന് ആരും ചിന്തിച്ചില്ല. പോക്ക് കേസ് എന്ന് കമന്റുകൾ ആളുകൾ ചെയ്തു തുടങ്ങി. അതിൽ വീട്ടുകാരും നാട്ടുകാരും ഉൾപ്പെടും. ആൾക്കാർ എന്ത് പറയും എന്നോർത്തു എനിക്ക് ദുഃഖം ഉണ്ടായിരുന്നില്ല. തലയുയർത്തി ജീവിക്കണം എന്നുമാത്രമായിരുന്നു ഉണ്ടായിരുന്നത്.
അതുകൊണ്ട് തന്നെയാണ് അങ്ങനെ ഒരു തീരുമാനം എടുത്തത്. ഇന്ന് ആ തീരുമാനം നല്ലതായിരുന്നു എന്ന് എനിക്ക് ബോധ്യമാകുന്നു. പലരും പറഞ്ഞിരുന്നു ടിക് ടോക്കിൽ വൈറലായതോടെയാണ് ബന്ധം പിരിഞ്ഞതെന്ന്. സത്യം എനിക്കും എന്റെ വേണ്ടപെട്ടവർക്കും അറിയാം. എനിക്ക് അത് മാത്രം മതി. ആര് എന്ത് പറഞ്ഞാലും എനിക്ക് അത് ബാധകമല്ല.
ഇത് എന്റെ ജീവിതമാണ് ഞാൻ ഹാപ്പിയാണ്. ഇപ്പോൾ ഒരുലക്ഷം രൂപയാണ് എന്റെ മാസ വരുമാനം. എന്നെ ജീവിതത്തിൽ നിന്നും ഒഴിവാക്കിയ ആളുടെ ശമ്പളത്തിന്റെ ഇരട്ടിയുടെ ഇരട്ടിയാണ് ഞാൻ നേടുന്നത്. ഇതൊന്നു എടുത്ത് പരാമർശിക്കണം എന്ന് തോന്നി. അയാളുടെ മുൻപിൽ വാശിയോടെ ജീവിക്കണം എന്നുണ്ടായി.
അപമാനിച്ചവരുടെ മുൻപിൽ അന്തസ്സോടെയാണ് ഞാൻ ഇന്ന് എത്തി നിൽക്കുന്നത്. ആരൊക്കെ വാശി കയറ്റിയാലും അപമാനിച്ചാലും ഞാൻ കൂടുതൽ ശക്തയാവുകയേ ഉള്ളൂ. പ്രതീക്ഷ കൈവിടാതെ, നഷ്ടപെട്ടതിനെ കുറിച്ച് ഓർത്ത് ദുഖിക്കാതെ പരിശ്രമിച്ചാൽ ഉറപ്പായും നിങ്ങൾ നല്ല നിലയിലെത്തും ഉറപ്പെന്നും ആമി പറയുന്നു.
