ഒട്ടേറെ വ്യത്യസ്ത ചിത്രങ്ങളുമായി മലയാള സിനിമാ പ്രേമികൾക്ക് മുന്നിൽ എത്തിയിട്ടുള്ള സംവിധായകനാണ് ആഷിഖ് അബു. മികച്ച ചിത്രങ്ങളും വിജയ ചിത്രങ്ങളും നൽകിയിട്ടുള്ള അദ്ദേഹത്തിന്റെ കരിയറിലെ ഏറ്റവും വലിയ പരാജയ ചിത്രമാണ് മമ്മൂട്ടി നായകനായി 2014ൽ പുറത്തിറങ്ങിയ ഗ്യാങ്സ്റ്റർ എന്ന സിനിമ.
വലിയ ഹൈപ്പോടെ എത്തിയ ഈ ചിത്രം ബോക്സ് ഓഫീസിൽ നേരിട്ടത് പരാജയം ആയിരുന്നു. എന്നാൽ ആ പരാജയത്തിന് കാരണം തന്റെ അലസത ആയിരുന്നു എന്നും അന്ന് പകുതിയോളം ഷൂട്ട് ചെയ്തപ്പോൾ തന്നെ ചിത്രം കൈവിട്ടു പോയി എന്ന കാര്യം മനസ്സിലായിരുന്നു എന്നും ആഷിക് അബു പറയുന്നു.
മമ്മൂട്ടിയെ അധോലോക നായകൻ ആയി കാണാൻ ഉള്ള ഒറ്റ ആഗ്രഹം കൊണ്ട് മാത്രം, യാതൊരു വിധ മുന്നൊരുക്കങ്ങളും കൃത്യമായി ചെയ്യാതെ ഒരുക്കിയത് കൊണ്ടാണ് ആ ചിത്രത്തിന് അങ്ങനെ ഒരു ദുർവിധി ഉണ്ടായത് എന്നും അദ്ദേഹം വിലയിരുത്തുന്നു. ഇപ്പോൾ ഈ ചിത്രത്തിന്റെ ഒരു പുതിയ വേർഷൻ ഒരുക്കാനുള്ള തയ്യാറെടുപ്പിൽ ആണ് താൻ എന്നാണ് ആഷിഖ് അബു ഒരു സ്വകാര്യ മാധ്യമത്തിന് നൽകിയ അഭിമുഖത്തിൽ പറയുന്നത്.
ഈ ചിത്രത്തിന്റെ പുതിയ വേർഷൻ ശ്യാം പുഷ്‌കരന്റെ തിരക്കഥയിലായിരിക്കും ഒരുങ്ങുകയെന്നും അതിനൊപ്പം ദിലീഷ് പോത്തൻ കൂടി തിരക്കഥാ രചനയിൽ വലിയ പങ്കു വഹിക്കുമെന്നും ആഷിഖ് അബു വെളിപ്പെടുത്തി.
നായകനായി മമ്മൂട്ടി തന്നെ എത്തുമോ എന്ന കാര്യത്തിൽ തീരുമാനമായിട്ടില്ലെങ്കിലും പ്ലാൻ ചെയ്യുന്ന പോലെ തന്നെ എല്ലാം ശരിയായി വരികയാണെങ്കിൽ അടുത്ത വർഷം ഷൂട്ടിങ് തുടങ്ങുമെന്നും ആഷിഖ് അബു പറയുന്നു. ചിലപ്പോൾ ഒരു പുതിയ താര നിര ആവും ചിത്രത്തിൽ അണിനിരക്കുക എന്നും സൂചന ഉണ്ട്
