ഒന്നിനൊന്ന് മികച്ച സൂപ്പർഹിറ്റുകൾ ഒരുക്കി മലയാള സിനിമയിൽ നിറഞ്ഞു നിൽക്കുന്ന സൂപ്പർ സംവിധായനാണ് ജീത്തു ജോസഫ്. മലയാളത്തിന്റെ താരരാജാവ് മോഹൻലാലിനെ തന്നെ നായകനാക്കി ഇപ്പോൾ ദൃശ്യം 2, റാം എന്നീ ചിത്രങ്ങൾ ഒരുക്കുന്ന തിരക്കിലാണ് ജീത്തു ജോസഫ്.
ചിത്രീകരണം പൂർത്തിയാ ദൃശ്യം 2 ന്റെ എഡിറ്റിങ്ങ് നടക്കകയാണിപ്പോൾ. ഇപ്പോഴിതാ മലയാളത്തിലെ മറ്റൊരു സൂപ്പർ താരമായ മമ്മൂട്ടിയോടൊപ്പമുള്ള ഒരു ചിത്രവും തന്റെ വലിയ ആഗ്രഹമാണ് എന്നാണ് ജീത്തു ജോസഫ് പറയുന്നത്. ഇതിനോടകം താൻ അദ്ദേഹത്തോട് മൂന്നു കഥകൾ പറഞ്ഞെങ്കിലും അത് മൂന്നും അദ്ദേഹത്തിന് ഇഷ്ടപ്പെട്ടില്ല എന്നും ജീത്തു പറയുന്നു.
ഏതായാലും താൻ ഇനിയും ശ്രമിക്കുമെന്നും അദ്ദേഹത്തോടൊപ്പം ഒരു ചിത്രം സംഭവിക്കുമെന്ന് തന്നെയാണ് പ്രതീക്ഷ എന്നും ജീത്തു ജോസഫ് പറഞ്ഞു. ജീത്തു ജോസഫ് പൃഥ്വിരാജ് ടീമിൽ ഒരുക്കിയ മെമ്മറീസ് എന്ന സൂപ്പർ ഹിറ്റിന്റെ കഥ ജീത്തു ആദ്യം മമ്മൂട്ടിയോടാണ് പറഞ്ഞത്.
അതുപോലെ ജീത്തു മോഹൻലാൽ കൂട്ടുകെട്ടിൽ ഒരുങ്ങിയ ദൃശ്യത്തിന്റെ കഥയും മമ്മൂട്ടിയുടെ മുന്നിലാണ് ആദ്യം എത്തിയത്. പക്ഷെ രണ്ടും അദ്ദേഹം ഒഴിവാക്കുകയായിരുന്നു. അത് കൂടാതെ താൻ ഒരുക്കിയ ബോഡി എന്ന ഹിന്ദി ചിത്രത്തിന്റെ കഥയും ആദ്യം മമ്മൂട്ടിയോടാണ് പറഞ്ഞത് എന്നും അദ്ദേഹത്തെ നായകനാക്കി ആ കഥയിൽ ഒരു മലയാള ചിത്രമൊരുക്കാൻ ആയിരുന്നു പ്ലാനെന്നും ജീത്തു വെളിപ്പെടുത്തുന്നു.
പക്ഷെ അതും അദ്ദേഹത്തിന് ഇഷ്ടമാവാത്തതു കാരണം പിന്നീട് ഹിന്ദിയിലേക്ക് എത്തുകയായിരുന്നു. താൻ അദ്ദേഹത്തോട് ഇതുവരെ പറഞ്ഞ മൂന്നു കഥയും ത്രില്ലർ സ്വഭാവം ഉള്ളതായിരുന്നുവെന്നും ജീത്തു ജോസഫ് വെളിപ്പെടുത്തി.
അതേ സമയം മൈ ബോസ്, മെമ്മറീസ്, ആദി തുടങ്ങിയ വലിയ ഹിറ്റുകളും ദൃശ്യം എന്ന ബ്രഹ്മാണ്ഡ വിജയവും നമ്മുക്ക് സമ്മാനിച്ച ജീത്തു ജോസഫ്, കമൽ ഹാസനെ നായകനാക്കി പാപനാശം, കാർത്തിയെ നായകനാക്കി തമ്പി എന്നീ തമിഴ് ചിത്രങ്ങളും, ഋഷി കപൂർ ഇമ്രാൻ ഹാഷ്മി ടീം അഭിനയിച്ച ബോഡി എന്ന ബോളിവുഡ് ചിത്രവും ഒരുക്കിയിട്ടുണ്ട്.
