എംടിയുടെ തിരക്കഥയായ രണ്ടാമൂഴം ജനപ്രിയ നായകന്‍ നടന്‍ ദിലീപ് ഏറ്റെടുത്തേക്കുമെന്ന് റിപ്പോര്‍ട്ടുകള്‍ കഴിഞ്ഞ ദിവസം പുറത്തുവന്നിരുന്നു. തിരക്കഥയെ ചൊല്ലിയുള്ള കലഹം വര്‍ധിച്ച സാഹചര്യത്തില്‍ ശ്രീകുമാര്‍ മേനോനുമായി രണ്ടാമൂഴം ചെയ്യാന്‍ താല്‍പ്പര്യമില്ലെന്ന് എംടി വ്യക്തമാക്കിയിരുന്നു.
തിരക്കഥ ചോദിച്ച് ആരെങ്കിലും വരികയാണെങ്കില്‍, അവരെ വെച്ച് രണ്ടമൂഴം സിനിമയാക്കുമെന്നും എം ടി വ്യക്തമാക്കിയതാണ്. ഈ സാഹചര്യത്തിലാണ് രണ്ടാമൂഴം ഏറ്റെടുക്കാന്‍ ദിലീപ് ഒരുങ്ങുന്നുവെന്ന റിപ്പോര്‍ട്ട് വരുന്നത്.
ദിലീപിന്റെ നേതൃത്വത്തില്‍ സിനിമാ ബന്ധമുള്ള പ്രമുഖ ദുബായ് വ്യവസായി ചിത്രത്തിന്റെ നിര്‍മ്മാണം ഏറ്റെടുത്തേക്കുമെന്നായിരുന്നു റിപ്പോര്‍ട്ടുകള്‍.
അങ്ങനെയെങ്കില്‍ നിലവില്‍ ചിത്രത്തിനായി കാസ്റ്റ് ചെയ്യപ്പെട്ടവരില്‍ പലരും ചിത്രത്തില്‍ നിന്നും പുറത്തായേക്കുമെന്നും സൂചനയുണ്ട്. ദിലീപിന്റെ പ്രഖ്യാപിത ശത്രുക്കളായ സംവിധായകന്‍ ശ്രീകുമാര്‍ മേനോനും മുന്‍ ഭാര്യ മഞ്ജുവാര്യര്‍ക്കും ദിലീപിന്റെ മധുര പ്രതികാരമാണ് രണ്ടാമൂഴം എന്ന റിപ്പോര്‍ട്ടുകളാണ് മലയാള സിനിമയില്‍ നിന്നും ഏറ്റവും പുതിയതായി പുറത്തുവരുന്നത്.
എംടിയുടെ തിരക്കഥയില്‍ ഇതേ രണ്ടാമൂഴം മറ്റൊരു ടീമിനെക്കൊണ്ട് അവതരിപ്പിക്കുകയാണ് ദിലീപിന്റെ ലക്ഷ്യം. അതിനായി സുഹൃത്തായ മലയാളി വ്യവസായിയുടെ സഹായം ദിലീപ് തേടിയിട്ടുണ്ട്.
സംവിധായകനായി പ്രിയദര്‍ശന്‍ എത്തുമെന്നും മോഹന്‍ലാല്‍ തന്നെ നായകാനുമെന്നുമെല്ലാം റിപ്പോര്‍ട്ടുകളുണ്ട്. എന്നാല്‍, ഇക്കാര്യത്തില്‍ ദിലീപിന്റെ ഭാഗത്ത് നിന്ന് യാതോരു ഔദ്യോഗിക റിപ്പോര്‍ട്ടുകളും ലഭിച്ചിട്ടില്ല.
