ആദ്യമായാണ് ഗൾഫ് രാജ്യങ്ങളിൽ ഒരു മലയാള ചിത്രത്തിന്റെ അഡ്വാൻസ് ബുക്കിംഗ് ചിത്രം റിലീസ് ചെയ്യുന്നതിനും ആഴ്ചകൾക്കു മുൻപ് ആരംഭിക്കുന്നത്. ബുക്കിംഗ് ആരംഭിച്ചു മണിക്കൂറുകൾക്കകം റെക്കോർഡ് അഡ്വാൻസ് ബുക്കിംഗ് കൂടി നടന്നതോടെ ആ ചിത്രം ചരിത്രം കുറിച്ച് കഴിഞ്ഞു.
താര ചക്രവർത്തി മോഹൻലാൽ നായകനായ ഒടിയൻ എന്ന ബിഗ് ബജറ്റ് ചിത്രത്തെ കുറിച്ചാണ് പറയുന്നത് . അഡ്വാൻസ് ബുക്കിങ്ങിൽ ഒടിയൻ റെക്കോർഡ് നേട്ടമാണ് ഉണ്ടാക്കിയിരിക്കുന്നത് എന്ന് ഈ ചിത്രം ഗൾഫ് രാജ്യങ്ങളിൽ വിതരണം ചെയ്യുന്ന വേൾഡ് വൈഡ് ഫിലിംസ് തങ്ങളുടെ ഒഫീഷ്യൽ ഫേസ്ബുക് പേജിലൂടെ അറിയിച്ചു.
യു എ ഇയിലെ നോവ സിനിമാസ്, ബഹ്‌റൈൻ, വി ഓ എക്സ് സിനിമാസ് എന്നിവിടങ്ങളിൽ ആണ് ഗൾഫിലെ ഈ ചിത്രത്തിനായുള്ള ബുക്കിംഗ് ആരംഭിച്ചത്. ഇത് കൂടാതെ ഓസ്ട്രേലിയ, പോളണ്ട് എന്നിവിടങ്ങളിലും ഒടിയൻ അഡ്വാൻസ് ബുക്കിംഗ് ആരംഭിച്ചിട്ടുണ്ട്.
നോവ സിനിമാസിൽ 91 ഷോകൾ ആണ് ആദ്യ വീക്കെൻഡിൽ ഒടിയനു വേണ്ടി ചാർട്ട് ചെയ്തിരിക്കുന്നത്. ബഹറിനിൽ പത്തു ഷോകളുടെ ബുക്കിംഗ് തുടങ്ങിയപ്പോൾ വി ഓ എക്സ് സിനിമാസിൽ ഇരുപത്തിനാലു ഷോകളുടെ ബുക്കിംഗ് ആണ് തുടങ്ങിയത്. ഓസ്‌ട്രേലിയയിൽ 16 ഷോകളുടെ ബുക്കിംഗ് തുടങ്ങിയപ്പോൾ പോളണ്ടിൽ ഒടിയൻ ഫാൻ ഷോയുടെ ബുക്കിംഗ് ആണ് തുടങ്ങിയത്.
ഒരു മലയാള സിനിമയ്ക്കു ലഭിക്കുന്ന എക്കാലത്തെയും വലിയ ഓവർസീസ് റിലീസ് ആണ് ഈ ചിത്രത്തിന് ലഭിക്കാൻ പോകുന്നത്. യു എസ് എ , യു കെ തുടങ്ങിയ സ്ഥലങ്ങളിലും റെക്കോർഡ് റിലീസ് ആണ് പ്ലാൻ ചെയ്തിരിക്കുന്നത്. ഒടിയൻ മലയാളം വേർഷനും തെലുങ്കു ഡബ്ബിങ് വേർഷനും ഒരേ ദിവസം തന്നെയാണ് റിലീസ് ചെയ്യാൻ പോകുന്നത് എന്ന പ്രത്യേകതയും ഉണ്ട്.
