ഫേസ്ബുക്കിലൂടെ അശ്ലീല സന്ദേശം അയച്ച സീരിയല്‍ നടന് ചുട്ടമറുപടി നല്‍കി ട്രാന്‍സ്‌ജെന്‍ഡര്‍ മേക്കപ്പ് ആര്‍ട്ടിസ്റ്റ്. വിനീത് സീമ എന്ന മേക്കപ്പ് ആര്‍ട്ടിസ്റ്റ് തന്നെ നിരന്തരം ശല്യം ചെയ്തിരുന്ന യഹിയ ഖാദര്‍ എന്ന യുവാവിനെ പൊതുസമൂഹത്തിന് മുന്നില്‍ തുറന്ന് കാട്ടിയാണ് തക്കതായ മറുപടി നല്‍കിയത്.
നടന് തനിക്ക് അയച്ച അശ്ലീല സന്ദേശങ്ങളുടെ സ്‌ക്രീന്‍ ഷോട്ട് ഉള്‍പ്പെടെ വിനീത് സീമ ഫേസ്ബുക്കില്‍ പോസ്റ്റ് ചെയ്തു.
ദാരിദ്ര്യം പിടിച്ച സീരിയല്‍ നടന്റെ രോദനം ആരേലും കേള്‍ക്കൂ എന്ന തലക്കെട്ടോടെയാണ് വിനീത് സീമ ഫെയ്‌സ്ബുക്ക് പോസ്റ്റ് ഇട്ടിരിക്കുന്നത്. സ്വകാര്യ ചിത്രങ്ങള്‍ അയച്ചുതരാന്‍ യഹിയ വിനീത് സീമയോട് ആവശ്യപ്പെട്ടു. സൗഹൃദം തുടങ്ങാന്‍ താത്പര്യമുണ്ടെന്ന് പറഞ്ഞാണ് ഇയാള്‍ ചാറ്റിംഗ് തുടങ്ങിയത്.
നിരവധി ആളുകള്‍ തന്റെ സൗഹൃദത്തിനായി കാത്തിനില്‍ക്കുകയാണെന്നും ഫ്രണ്ട്ഷിപ്പ് ചോദിക്കുമ്പോള്‍ വേണ്ട എന്ന് പറയുന്നത് ശരിയല്ലെന്നും യഹിയ സന്ദേശത്തില്‍ പറയുന്നു. എന്നാല്‍ അത്തരത്തില്‍ പലരും ഉണ്ടാകുമെന്നും എന്നാല്‍ തനിക്ക് സൗഹൃദം വേണ്ടെന്നുമാണ് വിനീത് സീമ മറുപടി നല്‍കിയത്.
ഞാന്‍ തന്റെ സെക്‌സി ഫോട്ടോകളില്‍ ആകൃഷ്ടനായെന്നും അതിനാലാണ് കൂടുതല്‍ ഫോട്ടോകള്‍ ആവശ്യപ്പെട്ടതെന്നും എന്നാല്‍ താന്‍ നല്ലൊരു വ്യക്തിയല്ലെന്നും യഹിയ പറയുന്നു.
ശല്യം സഹിക്കവയ്യാതെ ആയതോടെയാണ് വിനീത് സീമ ഇവയുടെ സ്‌ക്രീന്‍ ഷോട്ട് എടുത്ത് ഫേസ്ബുക്കിലൂടെ പോസ്റ്റ് ചെയ്തത്.
