മിമിക്രി രംഗത്ത് നിന്നും സിനിമയിലേക്ക് എത്തി പിന്നീട് മലയാള സിനിമയിലെ ജനപ്രിയ നായകനായി മാറിയ താരമാണ് നടന്‍ ദിലീപ്. കമലിന്റെ സംവിധാന സഹായി ആയി എത്തിയ ദിലീപ് ചെറിയ വേഷങ്ങള്‍ ചെയ്ത് കൊണ്ടാണ് അഭിനയത്തിലേക്ക് എത്തിയത്.
പിന്നീട് നായകനായി മാറിയ താരം മലയാള സിനിമയില്‍ തന്റെ സര്‍വ്വാധിപത്യം സ്ഥാപിക്കുക ആയിരുന്നു.നിരവധി സൂപ്പര്‍ഹിറ്റ് ചിത്രങ്ങളിലൂടെ പ്രേക്ഷകരെ ചിരിപ്പിച്ചും സങ്കടപ്പെടുത്തിയും ആണ് ദിലീപ് പ്രേക്ഷകരുടെ മനസിലേയ്ക്ക് ചേക്കേറിയത്.
മഞ്ജുവുമായുള്ള വിവാഹമോചന ശേഷം കാവ്യമൊത്ത് ദാമ്പത്യ ജീവിതം നയിക്കുകയാണ് ദിലീപ്. മഹാലക്ഷ്മി എന്ന മകളും ഇരുവര്‍ക്കുമുണ്ട്. മഹാലക്ഷ്മിക്ക് ഇന്ന് ആരാധകരേറെയാണ്. ഇപ്പോഴിതാ മഹാലക്ഷ്മിയെ കുറിച്ച് സംസാരിക്കുകയാണ് ദിലീപ്.
മഹാലക്ഷ്മി ഭയങ്കര കാന്താരിയാണ്. കഴിഞ്ഞ രണ്ട് ദിവസം ഷൂട്ട് കാരണം താന്‍ വൈകിയായിരുന്നു എഴുന്നേറ്റതെന്നും അതിനിടെ സ്‌കൂളില്‍ പോകുന്നതിന് മുമ്പ് മഹാലക്ഷ്മി തന്നെ വിളിച്ചിരുന്നുവെന്നും എന്നാല്‍ തനിക്ക് ഫോണ്‍ എടുക്കാന്‍ കഴിഞ്ഞില്ലെന്നും അപ്പോള്‍ ഒരു വോയ്‌സ് നോട്ട് അയച്ചുവെന്നും ദിലീപ് പറയുന്നു.
ഇന്നലെയും ഇന്നും ഞാന്‍ അച്ഛനെ വിളിച്ചു. ഫോണ്‍ എടുത്തില്ല, ഞാന്‍ പോകുവാ എന്നായിരുന്നു വോയ്‌സ് മെസേജ്. മെസ്സേജ് അയച്ചതിന് ശേഷം ഇനി അച്ഛന് വിളിച്ചാല്‍ നമ്മള്‍ ഫോണ്‍ എടുക്കരുതെന്ന് കാവ്യയോട് പറഞ്ഞുവെന്നും ദിലീപ് ചിരിച്ചുകൊണ്ട് പറഞ്ഞു.
കാവ്യയും മക്കളും ഇപ്പോള്‍ ചെന്നൈയിലാണ്. മീനാക്ഷി അവിടെയാണ് പഠിക്കുന്നതെന്നും അതുകൊണ്ടാണ് അങ്ങോട്ട് താമസം മാറിയതെന്നും മഹാലക്ഷ്മിയും അവിടെ യുകെജിയില്‍ പഠിക്കുകയാണെന്നും ദിലീപ് പറയുന്നു.
