മലയാളികൾക്ക് ഏറെ പ്രിയങ്കരിയായ നടിയാണ് പാർവതി തിരുവോത്ത്. ശക്തമായ നിരവധി കഥാപാത്രങ്ങളെ അവതരിപ്പിച്ച് പാർവതി പ്രേക്ഷകരുടെ ഇഷ്ടം നേടിയെടുത്തു. പലപ്പോഴും നിലപാടുകൾ കൊണ്ടും പാർവതി ശ്രദ്ധിക്കപ്പെട്ടു. ഇടയ്ക്ക് ബോൾഡ് ലുക്കിലുള്ള ഫോട്ടോഷൂട്ടുകളും താരം നടത്താറുണ്ട്.
ഇപ്പോൾ വളരെ വ്യത്യസ്തമായ ലുക്കിലുള്ള പാർവതിയുടെ ചിത്രങ്ങളാണ് സോഷ്യൽ മീഡിയയിൽ ശ്രദ്ധ നേടുന്നത്. കറുപ്പ് നിറത്തിലെ സാരിയിലാണ് പാർവതിയെത്തിയിരിക്കുന്നത്. കഴിഞ്ഞ ദിവസം മുംബൈയിൽ വച്ച് നടന്ന ആമസോൺ പ്രൈമിന്റെ ഒരു പരിപാടിയിൽ പങ്കെടുക്കാനെത്തിയതായിരുന്നു പാർവതി.
നാഗചൈതന്യ നായകനാകുന്ന വെബ്‌സീരിസ് ധൂതയുമായി ബന്ധപ്പെട്ടതായിരുന്നു ചടങ്ങ്. വിക്രം കുമാർ സംവിധാനം ചെയ്യുന്ന വെബ്‌സീരിസ് ആമസോൺ പ്രൈമിലൂടെയാണ് പുറത്തിറങ്ങുന്നത്. ഹൊറർ എന്റർടെയ്‌നർ ആയാണ് ധൂത ഒരുങ്ങുന്നത്. ഓഗസ്റ്റിലോ സെപ്റ്റംബറിലോ ധൂത പ്രേക്ഷകരിലേക്കെത്തും. പാർവതിയും പ്രിയ ഭാസ്‌കറും ധൂതയിൽ പ്രധാന വേഷങ്ങളിലെത്തുന്നുണ്ട്. ഇത് ആദ്യമായാണ് ഒരു ഹൊറർ ചിത്രത്തിൽ നാഗ ചൈതന്യ അഭിനയിക്കുന്നത്. മൂന്ന് സീസണുകളിലായി ഒരുങ്ങുന്ന വെബ് സീരിസ് 8-10 എപ്പിസോഡുകളായാണ് പ്രേക്ഷകരിലേക്കെത്തുക എന്നാണ് അറിയുന്നത്.
മമ്മൂട്ടി ചിത്രം പുഴുവാണ് പാർവതിയുടേതായി ഇനി പുറത്തിറങ്ങാനുള്ള ചിത്രം. നവാഗതയായ റത്തീന ആണ് ചിത്രം സംവിധാനം ചെയ്യുന്നത്. ചിത്രത്തിന്റെ ടീസറും പോസ്റ്ററുകളുമെല്ലാം ഓൺലൈനിൽ തരംഗമായിരുന്നു. മമ്മൂട്ടിയുടെ മേക്കപ്പ് മാനായ എസ്.ജോർജും ദുൽഖറിന്റെ വേഫെയർ ഫിലിംസും ചേർന്നാണ് പുഴു നിർമ്മിച്ചിരിക്കുന്നത്.
പലപ്പോഴും തന്റെ നിലപാടുകൾ കൊണ്ടും ഉറച്ച തീരുമാനങ്ങൾ കൊണ്ടും മറ്റു നടിമാരിൽ നിന്ന് വ്യത്യസ്തയാണ് പാർവതി. സിനിമയ്ക്കുള്ളിൽ സ്ത്രീകൾ നേരിടുന്ന പ്രശ്‌നങ്ങളെ പറ്റിയൊക്കെ പലപ്പോഴായി പാർവതി തുറന്നു പറഞ്ഞ് മുന്നോട്ട് വന്നിട്ടുണ്ട്. അടുത്തിടെ ഹേമ കമ്മിറ്റി റിപ്പോർട്ട് പുറത്തുവന്നാൽ ചലച്ചിത്ര മേഖലയിലെ പല വിഗ്രഹങ്ങളും വീണുടയുമെന്നും പാർവതി പറഞ്ഞിരുന്നു
ഫാഷൻ സെൻസിന്റെ കാര്യത്തിലും പാർവതി പിന്നോട്ടല്ല. ഗ്ലാമറസ് ലുക്കിലും ബോൾഡ് ലുക്കിലും തനിനാടൻ വേഷത്തിലും പാർവതി എത്താറുണ്ട്. സൗഹൃദങ്ങൾക്കും വലിയ വില കൽപ്പിക്കുന്ന കൂട്ടത്തിലാണ് താരം. അടുത്തിടെ സുഹൃത്തുക്കൾക്കൊപ്പമുള്ള ചിത്രങ്ങളുമായും താരം ഇൻസ്റ്റഗ്രാമിൽ എത്തിയിരുന്നു.
