മലയാളികളുടെ പ്രിയപ്പെട്ട നടന്മാരില്‍ ഒരാളായിരുന്ന മുരളി. ഈ ലോകത്തോട് അദ്ദേഹം വിടപറഞ്ഞുവെങ്കിലും അഭിനയിച്ചുതകര്‍ത്ത പല ചിത്രങ്ങളിലൂടെയും അദ്ദേഹം ഇന്നും പ്രേക്ഷക മനസ്സില്‍ ജീവിക്കുകയാണ്.
ഇപ്പോഴിതാ മുരളിയുടെ വസാന നിമിഷങ്ങളെ കുറിച്ച് സംസാരിക്കുകയാണ് അടുത്ത സുഹൃത്തും നടനും ഡബ്ബിങ് ആര്‍ട്ടിസ്റ്റുമായ അലിയാര്‍. നെഞ്ച് എരിച്ചില് അനുഭവപ്പെട്ടതോടെയാണ് മുരളിയെ ആശുപത്രിയില്‍ പ്രവേശിപ്പിച്ചതെന്ന് അലിയാര്‍ പറയുന്നു.
ആശുപത്രിയില്‍ എത്തി ഐസിയുവിലേക്ക് കയറും മുമ്പേ തന്നെ മുരളിയുടെ ബോധം പോയിരുന്നു. പിന്നെ അദ്ദേഹം തിരിച്ചുവന്നില്ലെന്നും ആശുപത്രിയില്‍ എത്തിയതിന്റെ തലേ ദിവസം അദ്ദേഹത്തിന് നെഞ്ചുവേദന വന്നിരുന്നുവെന്നും അലിയാര്‍ കൂട്ടിച്ചേര്‍ത്തു.
നെഞ്ചെരിച്ചില്‍ പോലെയാണ് അദ്ദേഹത്തിന് അനുഭവപ്പെട്ടത്. ഒരുപക്ഷേ ഡയബെറ്റിക് രോഗിയായത് കൊണ്ടാവാം തീവ്ര വേദന ഇല്ലായിരുന്നതെന്നും കുറേ സമയം നെഞ്ചിരിച്ചിലാണെന്ന് പറഞ്ഞ് ജലൂസിന്‍ കഴിക്കുകയും ചായ കുടിക്കുകയും ചെയ്തുവെന്നും അലിയാര്‍ പറയുന്നു.
രാത്രി രണ്ട് മണിയായതോടെ വേദന സഹിക്കാനാവാതെയായി. ഉടന്‍ തന്നെ ആശുപത്രിയിലെത്തിക്കുകയായിരുന്നുവെന്നും രാവിലെയായപ്പോള്‍ സ്ഥിതി ഗുരുതരമായെന്നും ഐസിയുവിലേക്ക് കൊണ്ടുപോകും മുമ്പ് അദ്ദേഹത്തെ കണ്ടപ്പോള്‍ തനിക്കെന്താണ് പറ്റിയതെന്നും കുഴപ്പം വല്ലതുമുണ്ടോ എന്നായിരുന്നു അവസാനമായി ചോദിച്ചതെന്നും അലിയാര്‍ പറയുന്നു
