മലയാളി പ്രേക്ഷകരുടെ ഇഷ്ട റിയാലിറ്റി ഷോകളിലൊന്നാണ് ബിഗ് ബോസ്. ഈ റിയാലിറ്റി ഷോയിലൂടെ വലിയ നിലകളിലേക്ക് എത്തിയ ഒത്തിരി പേരുണ്ട്. പലര്‍ക്കും ലക്ഷക്കണക്കിന് ആരാധകരെയാണ് ലഭിച്ചത്. അതില്‍ രണ്ടുപേരാണ് അഖില്‍ മാരാരും ഡോ റോബിന്‍ രാധാകൃഷ്ണനും.
ബിഗ് ബോസ് മലയാളം റിയാലിറ്റി ഷോയിലൂടെ ഏറ്റവും കൂടുതല്‍ പ്രശസ്തനായ താരമായിരിക്കും റോബിന്‍ രാധാകൃഷ്ണന്‍. അപ്രതീക്ഷിതമായി പുറത്തായ ഡോക്ടര്‍ക്ക് ആരാധകര്‍ വലിയ സ്വീകരണമൊരുക്കിയത് വലിയ ചര്‍ച്ചയായിരുന്നു.
ഇതിനിടെ റോബിന്‍ സിനിമയില്‍ അഭിനയിക്കുമെന്ന വാര്‍ത്തകളും പുറത്തെത്തി. പിന്നീട് അപ്ഡേറ്റുകളൊന്നും വന്നില്ലെങ്കിലും റോബിന്റെ ആരാധകരുടെ എണ്ണത്തില്‍ കുറവൊന്നുമില്ല. റോബിനെ കുറിച്ച് ചില കാര്യങ്ങള്‍ വെളിപ്പെടുത്തിക്കൊണ്ടായിരുന്നു അഖില്‍ മാരാരും ശ്രദ്ധനേടുന്നത്.
അഖിലും റോബിനും തമ്മില്‍ എന്തൊക്കെയോ പ്രശ്‌നങ്ങളുണ്ടെന്ന തരത്തില്‍ വാര്‍ത്തകള്‍ പ്രചരിച്ചിരുന്നു. എന്നാല്‍ അങ്ങനെയൊന്നുമില്ലെന്ന് തെളിയിക്കുന്ന രീതിയിലുള്ള പുതിയ വാര്‍ത്തയാണ് ഇപ്പോള്‍ പുറത്തുവരുന്നത്. ഇരുവരും ഒരു പരിപാടിയില്‍ ഒന്നിക്കാന്‍ പോകുകയാണെന്നാണ് ആ വാര്‍ത്ത.
ഇരുവരും ഒന്നിച്ച് പ്രേക്ഷകരുടെ മുന്നിലേക്ക് എത്താന്‍ പോകുകയാണ്. ഡോ റോബിനാണ് ഇതുസംബന്ധിച്ച വിവരം സോഷ്യല്‍മീഡിയയിലൂടെ പുറത്തുവിട്ടത്. അല്‍വാദിയ സിറ്റി സെന്റര്‍ ഷാര്‍ജയിലാണ് പരിപാടി നടക്കുന്നത്. ഡിസംബര്‍ 13നാണ് പരിപാടി.
