മലയാളത്തിലും തമിഴിലും നല്ല കുറച്ച് സിനിമകള്‍ സമ്മാനിച്ച സംവിധായകനാണ് ബിജോയ് നമ്പ്യാര്‍. മണിരത്‌നത്തിന്റെ അസിസ്റ്റന്റായിട്ടായിരുന്നു ബിജോയ് തന്റെ കരിയര്‍ തുടങ്ങിയത്. 2011ല്‍ ശൈത്താന്‍ എന്ന സിനിമ സംവിധാനം ചെയ്ത് സ്വതന്ത്ര സംവിധായകനായി മാറി.
തെന്നിന്ത്യന്‍ സൂപ്പര്‍താരം ദുല്‍ഖര്‍ സല്‍മാനെ നായകനാക്കി 2016ല്‍ സോളോ എന്ന ആന്തോളജി സിനിമ സംവിധാനം ചെയ്ത് ബിജോയ് മലയാള സിനിമയിലും തന്റെ സംവിധാന മികവ് തെളിയിച്ചു. വ്യത്യസ്തമാര്‍ന്ന സിനിമകളാണ് ബിജോയ് ഒരുക്കിയത്.
കാളിദാസ് ജയറാം, അര്‍ജുന്‍ ദാസ് എന്നിവര്‍ പ്രധാന കഥാപാത്രങ്ങളായി എത്തുന്ന പോര്‍ ആണ് ബിജോയിയുടെ ഏറ്റവും പുതിയ ചിത്രം. ഈ ചിത്രത്തിന്റെ പ്രൊമോഷനുമായി ബന്ധപ്പെട്ട് ബിജോയ് നല്‍കിയ അഭിമുഖമാണ് ശ്രദ്ധനേടുന്നത്.
മമ്മൂട്ടിയെ കുരിച്ചും മോഹന്‍ലാലിനെ കുറിച്ചുമായിരുന്നു ബിജോയ് സംസാരിച്ചത്. രണ്ട് നടന്മാരും വ്യത്യസ്തത പരീക്ഷിക്കാന്‍ ആഗ്രഹിക്കുന്നവരാണെന്നും ഒരാളുടെ സ്‌ക്രിപ്റ്റ് സെല്ക്ഷന്‍ നല്ലതാണെന്നും മറ്റേയാളുടെ മോശമാണെന്നും പറയാന്‍ കഴിയില്ലെന്നും ബിജോയ് പറഞ്ഞു.
നേരത്തെ ലാലേട്ടന്റെ സ്‌ക്രിപ്റ്റ് സെലക്ഷന്‍ ഗംഭീരവും മമ്മൂക്കയുടേത് പിന്നോക്കവുമായിരുന്നു. ഇപ്പോള്‍ അത് റിവേഴ്‌സില്‍ സംഭവിക്കുകയാണെന്നും നാളെ അത് ചിലപ്പോള്‍ മാറിയേക്കാമെന്നും രണ്ടുപേരും നല്ല പ്രൊജക്ടുകളുടെ ഭാഗമായിട്ടുണ്ടെന്നും ബിജോയ് പറയുന്നു.
