മലയാള സിനിമയിലെ താരരാജാവ് മോഹന്‍ലാല്‍ നായകനായി എത്തിയ ചിത്രങ്ങളില്‍ ഒന്നായിരുന്നു കോളേജ് കുമാരന്‍. സംവിധായകന്‍ തുളസിദാസിന്റെ സംവിധാനത്തിലൊരുങ്ങിയ ചിത്രം 2008ലാണ് പുറത്തിറങ്ങിയത്.
ചിത്രത്തില്‍ പ്രമുഖ നടി വിമലാരാമനായിരുന്നു നായിക. ഈ ചിത്രത്തിലെ മോഹന്‍ലാലിന്റെ പ്രതിഫലവുമായി ബന്ധപ്പെട്ട് സംവിധായകന്‍ തുളസി ദാസ് പറഞ്ഞ കാര്യങ്ങളാണ് ഇപ്പോള്‍ ശ്രദ്ധ നേടുന്നത്.
ഒരു കോടി രൂപയാണ് ചിത്രത്തിന് വേണ്ടി മോഹന്‍ലാല്‍ പ്രതിഫലമായി ചോദിച്ചതെന്നും എന്നാല്‍ അദ്ദേഹം അത്രയൊന്നും വാങ്ങിയിട്ടില്ലെന്നും മാസ്റ്റര്‍ ബിന്‍ ചാനലിന് നല്‍കിയ അഭിമുഖത്തില്‍ സംവിധായകന്‍ പറഞ്ഞു.
സാധാരണ മോഹന്‍ലാലിന്റെ ഡേറ്റ് കിട്ടാന്‍ ഒരു വര്‍ഷവും രണ്ട് വര്‍ഷവുമൊക്കെ കാത്തിരിക്കണമായിരുന്നു. എന്നാല്‍ തനിക്ക് മൂന്ന് മാസത്തിനുള്ളില്‍ താരത്തിന്റെ ഡേറ്റ് കിട്ടിയെന്നും മൂന്നുമാസം കൊണ്ട് തന്നെ ചിത്രത്തിന്റെ ഷൂട്ടിങ് തുടങ്ങിയെന്നും അദ്ദേഹം പറഞ്ഞു.
ഒന്നേകാല്‍ കോടി രൂപ മോഹന്‍ലാലിന് പ്രതിഫലം നല്‍കിയാണ് താന്‍ അഭിനയിപ്പിച്ചതെന്ന് അന്ന് വാര്‍ത്തകള്‍ വന്നിരുന്നു.എന്നാല്‍ അതെല്ലാം തെറ്റാണെന്നും 95 ലക്ഷം രൂപ മാത്രമാണ് ഒരു കോടി പറഞ്ഞിടത്ത് മോഹന്‍ലാല്‍ വാങ്ങിയതെന്നും 5 ലക്ഷം രൂപ പ്രൊഡ്യൂസര്‍ക്ക് നല്‍കിയെന്നും അദ്ദേഹം പറഞ്ഞു.
