തമിഴ് സൂപ്പര്‍ താരം സൂര്യയുടെ കരിയര്‍ ഗ്രാഫ് കുത്തനെ ഉയര്‍ത്തിയ ചിത്രങ്ങളിലൊന്നായിരുന്നു വാരണം ആയിരം. തമിഴിലെ ഹിറ്റ് ലിസ്റ്റില്‍ ഇടം പിടിച്ച ചിത്രം 2008ലായിരുന്നു പുറത്തിറങ്ങിയത്. ഇക്കാലത്ത് ലഭിക്കുന്നത് പോലെ പാന്‍ ഇന്ത്യന്‍ ലെവലിലുള്ള സ്വീകരണം ചിത്രത്തിന് അക്കാലത്ത് ലഭിച്ചിരുന്നു.
പ്രമുഖ സംവിധായകന്‍ ഗൗതം വാസുദേവ് മേനോനായിരുന്നു ചിത്രം സംവിധാനം ചെയ്തത്. സൂര്യ-ഗൗതം വാസുദേവ് മേനോന് കൂട്ടുകെട്ടിലൊരുങ്ങിയ ചിത്രം വന്‍ വിജയമാണ് തിയ്യേറ്ററില്‍ കൊയ്തത്. ചിത്രത്തില്‍ ഡബിള്‍ റോളിലായിരുന്നു സൂര്യ എത്തിയത്.
രണ്ട് വേഷങ്ങളും ഒത്തിരി പ്രേക്ഷക ശ്രദ്ധ പിടിച്ചുപറ്റി. സൂര്യയെ കൂടാതെ സിമ്രാന്‍, സെമീറ റെഡ്ഡി, രമ്യ സ്പന്ദന തുടങ്ങിയവരും ചിത്രത്തില്‍ പ്രധാന വേഷം കൈകാര്യം ചെയ്തിരുന്നു. ഇപ്പോഴിതാ ചിത്രത്തെ കുറിച്ച് ഗൗതം വാസുദേവ് മേനോന് പറഞ്ഞ കാര്യമാണ് ശ്രദ്ധനേടുന്നത്.
സൂര്യക്ക് പൊതുവേ ഡബിള്‍ റോളുകള്‍ ചെയ്യാന്‍ താത്പര്യമില്ലാത്ത ആളാണ്. കാരണം ഇരട്ടവേഷങ്ങള്‍ ചെയ്താല്‍ അത് വിശ്വസനീയമായിരിക്കില്ലെന്നാണ് സൂര്യ പറയാറുള്ളതെന്നും അതിനാല്‍ വാരണം ആയിരം എന്ന ചിത്രത്തില്‍ സൂര്യയുടെ അച്ഛനായി അഭിനയിക്കാന്‍ ആദ്യം പരിഗണിച്ചിരുന്നത് നടന്‍ മോഹന്‍ലാലിനെ ആയിരുന്നുവെന്ന് ഗൗതം വാസുദേവ് മേനോന് പറയുന്നു.
ചിത്രത്തിലെ കൃഷ്ണ എന്ന കഥാപാത്രം ചെയ്യേണ്ടിയിരുന്നത് മോഹന്‍ലാലായിരുന്നു. അല്ലെങ്കില്‍ ആ വേഷം നാന പഠേക്കര്‍ ചെയ്യണമെന്നായിരുന്നു ഗൗതം വാസുദേവ് മേനോന്റെ കണക്കുകൂട്ടലുകള്‍. എന്നാല്‍ പിന്നീട് സൂര്യ തന്നെ ചെയ്യാമെന്ന് പറയുകയായിരുന്നു.
