പ്രഖ്യാപനം മുതൽ പ്രേക്ഷകർ ശ്രദ്ധിച്ച ചിത്രമാണ് മലൈക്കോട്ടൈ വാലിബൻ. ഇത് ആദ്യമായിട്ടാണ് ലിജോ ജോസ് പെല്ലിശ്ശേരി സംവിധാനം ചെയ്യുന്ന ചിത്രത്തിൽ മോഹൻലാൽ നായകൻ ആവുന്നത്. ഇത് തന്നെയാണ് ചിത്രത്തിന്റെ ഹൈലൈറ്റ് എന്നതും. ലിജോ ജോസ് പെല്ലിശ്ശേരിയും മലയാളികളുടെ പ്രിയതാരം മോഹൻലാലും ഒന്നിക്കുമ്പോൾ എങ്ങനെയായിരിക്കും ചിത്രം എന്ന് കാണാൻ വേണ്ടി കാത്തിരിക്കുകയാണ് ആരാധകർ ഒന്നടങ്കം.
ഇപ്പോഴിതാ ചിത്രം സംബന്ധിച്ച് ഒരു പ്രധാന പ്രഖ്യാപനവുമായി എത്തിയിരിക്കുകയാണ് മോഹൻലാൽ.
ചിത്രത്തിൻറെ ട്രെയ്‌ലർ റിലീസ് സംബന്ധിച്ചാണ് അത്. ട്രെയ്‌ലർ എപ്പോൾ എത്തും എന്ന ചോദ്യം കഴിഞ്ഞ ഏതാനും ദിവസങ്ങളായി സോഷ്യൽ മീഡിയയിൽ ആരാധകർ ചോദിക്കുന്നുണ്ട്. ഇന്ന് വൈകിട്ട് 7.30 ന് ട്രെയ്‌ലർ എത്തും. ആവേശത്തോടെയാണ് ട്രെയ്‌ലർ റിലീസിം?ഗ് പ്രഖ്യാപനം ആരാധകർ സ്വീകരിച്ചിരിക്കുന്നത്. ടീസർ അടക്കം ചിത്രത്തിൻറെ പബ്ലിസിറ്റി മെറ്റീരിയലുകൾക്കൊക്കെ മികച്ച പ്രതികരണമാണ് സോഷ്യൽ മീഡിയയിൽ ലഭിച്ചിരുന്നത്.
ജനുവരി 25നാണ് ചിത്രം റിലീസ് ചെയ്യുക. ഇനിയും 10 ദിവസം ഉണ്ടെങ്കിലും ചിത്രത്തിൻറെ ആഘോഷ പരിപാടികൾ പലയിടത്തും ആരംഭിച്ചു കഴിഞ്ഞു. 25ന് രാവിലെ ആറര മുതൽ ഷോ ആരംഭിക്കും എന്നാണ് വിവരം.
