സ്റ്റുട്ട്ഗാർട്ട്: വിമാനം ചിറകുവിരിച്ച് പറന്നുയരുന്നതിനു മുമ്പെ പൈലറ്റ് ചിറകില്ലാതെ പറന്നുയർന്നു. കോക്പിറ്റിലൂടെ നിലത്തുറയ്ക്കാത്ത കാലുമായി വേച്ചുവേച്ചു നടന്ന പൈലറ്റിനെ ജർമൻ പോലീസ് അറസ്റ്റ് ചെയ്തു. ജർമനിയിലെ സ്റ്റുട്ട്ഗാർട്ട് വിമാനത്താവളത്തിലായിരുന്നു സംഭവം.
വെള്ളിയാഴ്ച സ്റ്റുട്ട്ഗാർട്ടിൽനിന്നും ലിസ്ബണിലേക്കുള്ള വിമാനത്തിന്‍റെ പൈലറ്റാണ് അറസ്റ്റിലായത്. നാൽപതുകാരനായ സഹപൈലറ്റ് അമിതമായി മദ്യപിച്ചാണ് വിമാനത്തിൽ എത്തിയത്. ഇയാൾക്ക് ശരിയായി നടക്കാൻപോലും കഴിയില്ലായിരുന്നു. ഇതോടെ യാത്രക്കാർ പോലീസിനെ വിവരം അറിയിക്കുകയായിരുന്നു.
ജർമൻ പോലീസ് വിമാനത്തിനുള്ളിൽ കടന്ന് പറക്കുന്നതിനു മുമ്പ് പറന്നുതുടങ്ങിയ കക്ഷിയെ നിലത്തിറക്കി. ഇയാളുടെ ലൈസൻസ് അധികൃതർ സസ്പെൻഡ് ചെയ്യുകയും 10,000 യൂറോ പിഴ ചുമത്തുകയും ചെയ്തു. സംഭവത്തെ തുടർന്ന് 106 യാത്രക്കാരുമായി പറന്നുയരാനിരുന്ന വിമാനം റദ്ദാക്കി.
