ഇത്തവണത്തെ ഏകദിന ലോക കപ്പ് തുടങ്ങി ദിവസങ്ങൾ കഴിഞ്ഞിട്ടും ഇന്ത്യ ഇതുവരെ മത്സരിക്കാനിറങ്ങിയിട്ടില്ല. ഈ മാസം അഞ്ചിന് ദക്ഷിണാഫ്രിക്കയ്ക്കെതിരെയാണ് ഇന്ത്യയുടെ ആദ്യ മത്സരം.
മറ്റ് ടീമുകൾ രണ്ടും മൂന്നും മത്സരങ്ങൾ കളിച്ച് കഴിയുമ്പോഴാണ് ഇന്ത്യ ആദ്യമായി കളത്തിലിറങ്ങുന്നത്.
ഇതോടെ ലോക കപ്പിന്റെ ഫിക്സ്ചറിനെതിരെ ഇന്ത്യൻ ആരാധകർ രംഗത്തെത്തി കഴിഞ്ഞു. ഫിക്സ്ചർ പ്രകാരം ലോക കപ്പിലെ അവസാന ഘട്ടങ്ങിൽ ഇന്ത്യയ്ക്ക് തുടരെ തുടരെ മത്സരത്തിലിറങ്ങേണ്ടി വരും.
എന്നാൽ എന്തുകൊണ്ടാണ് ഇന്ത്യയുടെ മത്സരങ്ങൾ ഇങ്ങിനെ തീരുമാനിക്കാൻ കാരണം. അതിന് ഐസിസിയെ മാത്രം കുറ്റപ്പെടുത്തിയിട്ട് കാര്യമില്ല.
കഴിഞ്ഞ മേയിലാണ് ലോക കപ്പിന്റെ ഫിക്സ്ചർ പുറത്തു വന്നത്. ജൂൺ രണ്ടിനായിരുന്നു ആദ്യം ഇന്ത്യയുടെ മത്സരം നിശ്ചയിച്ചിരുന്നത്.
എന്നാൽ ലോധ കമ്മിറ്റി നിർദേശപ്രകാരം ഐപിഎൽ നടന്നതിനുശേഷം 15 ദിവസം കഴിഞ്ഞേ ഇന്ത്യൻ ടീം അന്താരാഷ്ട്ര മത്സരം കളിക്കാൻ പാടുള്ളു. അതുകൊണ്ടാണ് മത്സരം നീട്ടിവെയ്ക്കാൻ ഐസിസി നിർബന്ധിതരായത്.
രണ്ടാമത്തെ കാരണം ടെലിവിഷൻ സംപ്രേക്ഷണാവകാശം നേടിയ സ്റ്റാർ സ്‌പോർട്‌സിന്റെ നിർദേശമാണ്. ഇന്ത്യയുടെ മത്സരങ്ങൾ ഗ്രൂപ്പ് ഘട്ടത്തിന്റെ അവസാനം വേണമെന്നായിരുന്നു അവരുടെ ആവശ്യം.
ഇന്ത്യയുടെ മത്സരങ്ങൾ തുടക്കത്തിലേ കഴിഞ്ഞു പോയാൽ ലോക കപ്പിന്റെ ആവേശം മങ്ങുമെന്നായിരുന്നു അവരുടെ വാദം. ഐസിസി ഇക്കാര്യം അംഗീകരിക്കുകയായിരുന്നു.
