പ്രേക്ഷകര്‍ ആകാംഷയോടെ കാത്തിരുന്ന ചിത്രം മലൈക്കോട്ടൈ വാലിബന് ഏറെ നാളത്തെ ഒരുക്കങ്ങളെല്ലാം കഴിഞ്ഞ് ഏതാനും ദിവസങ്ങള്‍ക്ക് മുമ്പ് തിയ്യേറ്ററുകളിലെത്തിയിരിക്കുകയാണ്. മലയാള സിനിമയിലെ താരരാജാവ് മോഹന്‍ലാല്‍ നായകനായി എത്തിയിരിക്കുന്ന പുതിയ ചിത്രം ലിജോ ജോസ് പെല്ലിശ്ശേരിയാണ് സംവിധാനം ചെയ്തിരിക്കുന്നത്.
മൂന്നൂറില്‍ പരം തിയ്യേറ്ററുകളിലാണ് മലൈക്കോട്ടൈ വാലിബന് പ്രദര്‍ശിപ്പിക്കുന്നത്. നിരവധി താരങ്ങളാണ് ചിത്രത്തില്‍ അണിനിരക്കുന്നത്. സൊണാലി കുല്‍ക്കര്‍ണി, ഡാനിഷ് സെയ്ത്, മനോജ് മോസസ്, ഹരീഷ് പേരടി തുടങ്ങിയവരെല്ലാം ചിത്രത്തില്‍ അഭിനയിക്കുന്നുണ്ട്.
പ്രണയവും വിവരഹവും പ്രതികാരവുമെല്ലാം ചിത്രത്തിലുണ്ട്. പ്രേക്ഷകര്‍ ഒത്തിരി പ്രതീക്ഷയോടെയായിരുന്നു വാലിബനെ കാത്തിരുന്നത്. എന്നാല്‍ ആ പ്രതീക്ഷയ്ക്കൊത്ത് വളരാന്‍ വാലിബന് കഴിഞ്ഞിട്ടില്ലെന്നും സമ്മിശ്ര പ്രതികരണമാണ് ലഭിച്ചുകൊണ്ടിരിക്കുന്നത് എന്നുമാണ് വിവരം.
ഇപ്പോഴിതാ വാലിബന് സിനിമയെ കുറിച്ച് സംസാരിക്കുകയാണ് മഞ്ജു വാര്യര്‍. വാലിബന് കംപ്ലീറ്റ് എല്‍ജെപി സിനിമയാണെന്നും അഭിനയം കൊണ്ടും ആകാരം കൊണ്ടും ലാലേട്ടന്‍ വാലിബനിലേക്ക് കൂടുമാറിയിരിക്കുകയാണെന്നും അദ്ദേഹത്തെ പറ്റി ഇതില്‍ കൂടുതല്‍ എന്ത് പറയാനാണെന്നും മഞ്ജു പറയുന്നു.
ചിത്രത്തിന്റെ ട്രെയിലര്‍ കണ്ടതിന് ശേഷം ഒരു ഫാന്റസി ലോകത്തേക്ക് പറക്കാനുള്ള മനസ്സുമായിട്ടായിരുന്നു വാലിബന് കണ്ടതെന്നും അതിലെ ഒരോ കഥാപാത്രങ്ങളും തന്നെ പണ്ട് വായിച്ച ചിത്രകഥയെ ഓര്‍മ്മിപ്പിച്ചുവെന്നും മുമ്പ് ചെയ്ത സിനിമകളെ പോലെ തന്നെ ലാലേട്ടന്‍ ഈ സിനിമയിലും വിസ്മയിപ്പിച്ചുവെന്നും മഞ്ജു പറയുന്നു.
